तुरुंगातून बाहेर आल्यानंतर कॅन्सर झाला; संजय राऊतांना विषप्रयोगाचा संशय, टॉक्सिक टेस्ट’ करणार?

काँग्रेस नेते राहुल गांधी यांनीही आपल्या प्रकृतीबाबत चिंता व्यक्त करत ‘टॉक्सिक टेस्ट’ करून घेण्याचा सल्ला दिल्याचा दावा राऊत यांनी केला आहे.

Sanjay Raut suspects poisoning attempt : शिवसेना ठाकरे गटाचे खासदार संजय राऊत यांनी आपल्या प्रकृतीबाबत खळबळजनक दावा केला आहे. तुरुंगात असताना आपल्यावर विषप्रयोग झाला असावा, अशी शंका त्यांनी व्यक्त केली आहे. तुरुंगातून बाहेर आल्यानंतर आपल्याला कॅन्सर झाल्याचंही राऊत यांनी यापूर्वी सांगितलं होतं. या पार्श्वभूमीवर काँग्रेस नेते राहुल गांधी यांनीही आपल्या प्रकृतीबाबत चिंता व्यक्त करत ‘टॉक्सिक टेस्ट’ करून घेण्याचा सल्ला दिल्याचा दावा राऊत यांनी केला आहे. त्यांच्या या वक्तव्यावर मंत्री गुलाबराव पाटील यांनी खोचक प्रतिक्रिया दिली आहे.

संजय राऊत यांनी सांगितलं की, काही दिवसांपूर्वी दिल्लीत राहुल गांधी यांची भेट झाली होती. या भेटीत राहुल गांधी यांनी त्यांच्या प्रकृतीची विचारपूस केली. आपल्या आजाराची सुरुवात तुरुंगात असतानाच झाल्याचं लक्षात आलं होतं, असं राऊत यांनी म्हटलं आहे. त्यावर तुरुंगात असताना काही घडलं असण्याची शक्यता नाकारता येत नाही, अशी शंका राहुल गांधी यांनी व्यक्त केल्याचं राऊत यांनी सांगितलं.

तुरुंगात असलेल्या आणि समाजासाठी आंदोलन करणाऱ्या व्यक्तींच्या जेवणात विषारी पदार्थ मिसळले जाण्याची शक्यता असू शकते, असा गंभीर संशयही राऊत यांनी व्यक्त केला. फक्त मी नाही. अनेक लोक तुरुंगात गेल्यावर त्यांच्या जेवणात हे लोक विष मिसळू शकतात, असा अनेकांना संशय आहे. राहुल गांधी यांनीही ही शंका व्यक्त करून मला सावध केलं, असं राऊत यांनी म्हटलं.

केतन अग्रवाल हत्याकांडात मोठा ट्विस्ट; चेतनसोबतचं डिलीट व्हाट्सॲप चॅट रिकव्हर, वर्गमित्र अटकेत

राहुल गांधी यांनी शरीरातील विषारी घटक तपासण्यासाठी ‘टॉक्सिक टेस्ट’ करून घेण्याचा सल्ला दिल्याचंही राऊत यांनी सांगितलं. तुमच्या शरीरामध्ये विष वाढीचा प्रकार दिसत आहे, त्यामुळे तुम्ही ताबडतोब टॉक्सिक टेस्ट करून घेणे गरजेचे आहे, असं राहुल गांधी यांनी आपल्याला सांगितल्याचा दावा राऊत यांनी केला. तुरुंगातून बाहेर आल्यानंतर इतर काही नेत्यांचीही प्रकृती खालावल्याचा संदर्भ या चर्चेदरम्यान देण्यात आल्याचं राऊत यांनी म्हटलं.

दरम्यान, संजय राऊत यांच्या या दाव्यावर शिवसेना शिंदे गटाचे नेते आणि मंत्री गुलाबराव पाटील यांनी प्रतिक्रिया दिली आहे. मला माहित नाही संजय राऊतांवर कधी विषप्रयोग झाला. मात्र संजय राऊत बाहेर आल्यावर वेगवेगळे प्रयोग सांगत असतात. प्रयोग किती झाले हे मला तपासावं लागेल, असा टोला पाटील यांनी लगावला. राहुल गांधी यांनी ‘टॉक्सिक टेस्ट’चा सल्ला दिल्याच्या राऊतांच्या दाव्यावरही गुलाबराव पाटील यांनी निशाणा साधला. राहुल गांधी हे कधी डॉक्टर झाले हे मला माहिती नाही, अशी खोचक प्रतिक्रिया त्यांनी दिली.

संजय राऊत यांनी तुरुंगातील काळ आणि त्यानंतर झालेल्या आजाराचा संबंध जोडत विषप्रयोगाची शक्यता व्यक्त केली असली, तरी या दाव्याला पुष्टी देणारा वैद्यकीय तपासणीचा निष्कर्ष किंवा अन्य पुरावा या माहितीत समोर आलेला नाही. त्यामुळे राऊतांच्या या दाव्यावरून आता राजकीय आरोप-प्रत्यारोपांना सुरुवात झाली आहे.

संबंधित बातम्या